Dae tres erèntzias isperièntzia e professionalidade distinghent sa butega artesana de frades Seches in s’ammanizadura de aberturas e serramentas de intro e de fora, de mòbiles fatos a mesura, de alàscios e de fruninzos a sa moda sarda pichirinados a manu, de torradura in trassas, acontzadura e annoadura de mòbiles e de portales.
Sa tecnologia est a s’acumandu de su connotu in s’arte de fàghere aberturas e fruninzos chi che jumpant sas proas de su tempus chi si che colat. Su de nde torrare a bogare a pizu sas mustras cuadas dae su tempus in sos casciabancos antigos de chentu e chentu annos in manu a privados, paris cun una chirca sighida e acorada de s’arte de sa pichirinadura a iscalpeddu, sunt parte manna de su trabàgliu nostru.
Su sole, sos frores, sos caddos, sos puzones misteriosos unu a ojos a s’àteru, ispigas, rosones de geometrias divèscias, decoraduras a grecas e a tritzas, cussertant s’iscena de su mòbile prìntzipe de sa domo sarda, sa càscia.
Giuta in doda dae sa cojuada noa, s’impitaiat a remonire sa cojuànscia e-i sos arminzos tèssidos, cosidos e recamados die pro die, pro meses intreos si no pro annos, dae sas fèminas manos de oro, e pro arribare totu sas siendas e-i sas prendas de sa domo.
Sas mantessi orizaduras e mustras antigas chi imbellitaiant sas àrcas o càscias in linna de castanza de su cojuonzu e faghiant galanos sos foghiles pòveros de massajos e de pastores, in tempos de oe dant vida, primore e gabbale a un’aposentu, a una coghina, a una càmera de letu de cojuados noos, mudant sos mòbiles, sas giannas e-i sos alàscios in elementos chi, cun dechidore, galania e elegàntzia paris cun sa robustesa faghent donzi domo acoliosa e familiare paris etotu comente l’est sa traditzione.
Fàghere a manu unu mòbile, una gianna, picare, resecare o intagliare una càscia no est unu tribàgliu che a sos àteros; est un’arte chi in pius de sa pratighesa chi bi cheret, impìciat totu sos sensos de su mastru e betat a pare sos sentidos de su mastruàscia cun s’istòria de su pòpulu sou in unu arrèjonu de intiriolu mannu chi mai sessat…
Pro custu chie leat in manos o ràsciat ebbia unu pinzu mastrinu sardu tocat chin cussu traste unu biculu de istòria chi s’est fata Ermosura e Bellesa.
